කොළඹ සහ තලෙයිමන්නාරම අතර දුම්රිය සේවය දශක කිහිපයකට පසුව යළි ඇරඹී ඇත. අතීතයේ කොළඹ සිට එකම දුම්රිය ප්රවේශ පත්රයකින් දකුණු ඉන්දියාවේ පම්බාන් දූපතේ පිහිටි ධනුෂ්කොඩි දුම්රියපළ
කරා යාමට හැකි වුවද 1964 ඇතිවූ සුළි සුළඟකින් ධනුෂ්කොඩි දුම්රියපළ ඇතුළු එම දූපතේ බොහෝ ස්ථාන වැනසුණි. ඉන්පසුව ඉන්දු ශ්රී ලංකා දුම්රිය සේවය රාමේෂ්වරම් අතර පැවැතියද පසුව එය මුළුමනින්ම නතර කොට දැමිණ.රාමේෂ්වරම් හි දක්නට ලැබෙන එකම ආගමික සිද්ධස්ථානය වන්නේ ‘කොත්නඩරාමාස්වාමි’ කෝවිලය. ශ්රී ලංකාව පාලනය කළ රාවණ රජු රාම අතින් පරාජය වීමෙන් අනතුරුව රාම කුමරු විසින් අප රටෙහි පාලකයා ලෙස විභීෂණ පත්කරනු ලැබිණි. විභීෂණ යනු රාවණා රජුගේ සොහොයුරකු ලෙස සැලකෙන අතර රාවණා හා රාම අතර පැවැති යුද්ධයේදී ඔහු සිය සොයුරු රාවණාට විරුද්ධ වී රාම කුමරුට සහය පළකරන්නට තීරණය කළේය.
රාම කෙතරම් ප්රබලයකු වුවද වසර දොළසක් තිස්සේ කළ යුද්ධය ජය ගත හැකි වූයේ විභීෂණ විසින් රාවණ රජුගේ දුර්වලකම් රාම හමුවේ හෙළිදරව් කිරීමෙන් පසුවය. මෙවැනි ආධාරයක් කළ විභීෂණ ශ්රී ලංකාවේ නව රජ ලෙස කිරුළු පළඳවන්නට රාම කුමරු පෙළඹීම මේ අනුව පුදුමයකට කරුණක් නොවේ. මෙම කිරුළු පැළඳවීම ‘පත්තාභිෂේකම්’ නම් වූ අතර එය සිදුකරන ලද්දේද මෙම කෝවිලෙහි බව පැවැසේ. එම සිදුවීම්වලට අදාළ සිතුවම් ද කෝවිලෙහි බිත්ති මත දක්නට ලැබේ. ඊට අමතරව විභීෂණ යනු රාමාගේ කෙතරම් සමීප හිතෛෂිවන්තයකු ද යත් රාමේෂ්වරම් හි පිහිටි ‘කොතන්ඩරාමාස්වාමි’ කෝවිලට ගොඩවැදීමෙන් දැකගත හැකිය. එහි රාම, සීතා, ලක්ෂ්මන, හනුමාන් හැරුණු විට විභීෂණ වෙනුවෙන් ද ප්රතිමාවක් ඉදිකොට තිබේ. 1964 දී සුළි සුළඟෙන් ගැලවුණු එකම ඓතිහාසික ගොඩනැගිල්ල මෙය වන අතර මුහුදෙන් වට වූ මෙය සංචාරකයන්ගේ ආකර්ෂණීය ස්ථානයක් බවට පත්ව තිබේ. රාම කුමරු වානර සේනාව පාලම (රාමසේතු) ඔස්සේ ශ්රී ලංකාව කරා වූ ගමන ආරම්භ කළේ මෙම කෝවිල පවතින ස්ථානයේ සිට බැව් පැවැසේ.
විභීෂණ ශ්රී ලංකාවේ පාලනයට පත්වීමෙන් පසු ඔහු ‘රාම පාලම’ බිඳ දමන ලෙස රාමගෙන් ඉල්ලා සිටියේය. ඒ ශ්රී ලංකාවේ ජාතික ආරක්ෂාව පිළිබඳව සිතා විය යුතුය. රාමා සිය දුන්නෙහි එක් කොණකින් පහර දී පාලම බිඳ දැමුවේය. මේ ආකාරයට මෙම නගරය “ධනුෂ්කොඩි’ නම් විය. එහි අරුත වන්නේ ‘දුන්නෙහි කෙළවර’ යන්නයි. එනම් ‘ධනුෂ්’ යනු ‘දුන්න’ වන අතර ‘කොඩි’ යනු ‘කෙළවර’ය. කෙසේ මුත් දෙරට අතර භෞමික වශයෙන් සම්බන්ධයක් පැවැති බැව් දැක්වෙන භූ ලක්ෂණ වර්තමානයේ පවා දැකිය හැකිය. මෙම කිලෝ මීටර් 18ක මුහුදු මාර්ගය හරහා පාලමක් සේ වැටුණු පර්වත වැනි භූමි ලක්ෂණ අදටත් දැකිය හැකිය. ඓතිහාසික කතා පුවතට අනුව මෙය රාම පාලමේ ශේෂයන් වන අතර භු විද්යාත්මක විග්රහයට අනුව මෙය වසර දහස් ගණනකට පෙර දෙරට අතර පැවැති භූමි සබඳතාවය පෙන්නුම් කරමින් ශේෂව ඇති ‘මුහුදු දඹ’ ය. මෙම දඹ ඇතැම් ස්ථානවලදී මුහුදින් මතුව පවතින අතර, ඇතැම් ස්ථානවල නොගැඹුරු මුහුදේ ගිලී ඇති ආකාරය පෙනේ. වර්තමානයේ අප රටෙහි දක්නට නොලැබෙන මැමත් රයිනෝසිරස් වැනි සතුන්ගේ පොසිල හමුවන්නට හේතුව නම් අදින් වසර දහස් ගණනකට පෙර ලංකාව සහ ඉන්දියාව අතර පැවැති මෙම භෞමික සම්බන්ධතාවය නිසා සතුන් සංක්රමණය වීමේ ප්රතිඵලයක් බව සත්ව සහ මානව පුරාවිද්යාඥයෝ පවසති. සතුන් සංක්රමණය වූයේ නම් මිනිසුන්ද මේ ආකාරයෙන් සංක්රමණය වන්නට ඇත. 
අප රටෙහි සංචාරකයන් දඹදිව සිද්ධස්ථාන හැරුණු විට ඉන්දියාවේ තවත් බොහෝ ස්ථාන වෙත සංචාරය කළද රාමේෂ්වරම් හා ධනුෂ්කොඩි ඔවුන් බොහොමයකගේ ගමනාන්තවල නැති බැව් පෙනෙන්නට තිබේ. ධනුෂ්කොඩි යනු පාළු, හොල්මන් නගරයක් ලෙස ප්රකටව ඇතත් එය වර්තමානයේ සුප්රකට සංචාරක ස්ථානයකි. නගරය මිය ගියද එහි තවමත් ජීවත්වන මිනිස්සු සිටිති. ස්ථානීය ලක්ෂණ නිසා එය ඡායාරූප ශිල්පීන්ගේ ද ආකර්ෂණීය ස්ථානයක් බවට පත්ව තිබේ.
එමෙන්ම සොබා සෞන්දර්ය සේම අද්භූත රසය විඳින්නවුන්ට ද ධනුෂ්කොඩි කදිම තෝතැන්නකි. තද සුළං කාලයට එහි වැලි මත නොයෙක් අද්භූත හැඩයන්ගෙන් යුතු රූප සටහන් මැවෙතැයි කියනු ලැබේ. ඇතැම් කාලයන්හිදී මිනිස් විලාපයන් බඳු අද්භූත හඬවල් ඇසෙන බවද ප්රකට රහසකි.
නුදුරු කාලයේදීම තලෙයිමන්නාරම ඔස්සේ ශ්රී ලංකා ඉන්දු දුම්රිය සේවය ඇරඹුණහොත් තලෙයිමන්නාරම ඔස්සේ දුම්රියෙන් ගොස් එතැන් සිට මගී නෞකාවක් මගින් ඔබට රාමේෂ්වරම් දක්වා යා හැක.
දැනට ධනුෂ්කොඩි කරා අප රටෙහි සිට ගමන් ගන්නේ නම් තෝරාගත යුත්තේ මදුරෙයි ගුවන් තොටුපළයි. ශ්රී ලංකාවේ සිට මදුරෙයි බලා ගමන් කිරීම සඳහා අඩු වියදම් ගාස්තු පිළිබඳ සොයා බලා එවැන්නක් තෝරාගත හැකිය. කටුනායක සිට මදුරෙයි දක්වා එක් ගමන් වාරයක් සඳහා මිහින් ලංකා සේවය රු. 10,900ක් පමණ අයකරද්දී ස්පයිස් ජෙට් හි ගාස්තුව වන්නේ 8,600ක් වැනි මුදලකි. අප රටෙහි සිට මදුරෙයි දක්වා ගුවනින් ගමන් කිරීමට පැයකට ආසන්න කාලයක් ගතවේ.
එහි සිට රාමේෂ්වරම් දක්වා කිලෝ මීටර් 169ක් පමණ පවතින අතර වාහන තදබදයක් නැති අවස්ථාවක නම් පැය තුනහමාරකින් පමණ රාමේෂ්වරම් දක්වා මහා මාර්ගයේ පොදු ප්රවාහන සේවයකින් ගමන් කළ හැකිය. එමෙන්ම මදුරෙයි සිට රාමේෂ්වරම් දක්වා දුම්රියෙන් ද ගමන් කළ හැකි අතර මදුරෙයි ප්රධාන දුම්රිය නැවතුම් ස්ථානයෙන් මේ පිළිබඳ තොරතුරු සහ දුම්රිය කාලසටහන් ලබාගත හැකිය. මේ සඳහා ද පැය තුනක පමණ කාලයක් ගතවේ. රාමේෂ්වරම් සිට ධනුෂ්කොඩි දක්වා පොදු ප්රවාහන සේවයක් නොමැති අතර ගමන් කළ යුත්තේ කුලී වාහනයකිනි. වඩදිය සමයේදී රමේෂ්වරම් සිට ධනුෂ්කොඩි දක්වා ගමන් ගන්නා මාර්ගය සුළු වශයෙන් ජලයෙන් යටවේ. නමුත් එය රෝද හතරම ක්රියාත්මක වන වාහන සඳහා ගැටලුවක් නොවන අතර ඒවා පහසුවෙන් මෙම ජල තලය ඔස්සේ ගමන් කරයි. දුර සිට දකින්නකුට මෙහිදී පෙනෙන්නේ මුහුද මැදින් වාහනයක් ගමන් කරන ආකාරයකිනි. බාදිය සමයේදී මෙම මාර්ගය වැල්ලෙන් වැසී යයි. එහි ගමන් කරන්නට ද රෝද හතරම ක්රියාත්මක වන වාහනයක් අවශ්ය වේ. මෙවැනි වාහන රාමේෂ්වරම් හිදී සොයාගන්නට හැකි අතර රාමේෂ්වරම් නගරයේ ඇති බොහෝ සංචාරක ආයතනවලින් ධනුෂ්කොඩි කරා ගමන් කරන්නට අවශ්ය කරන මගපෙන්වීම කරනු ලබයි. එබැවින් ඔබට ඉතා පහසුවෙන් මෙම ප්රදේශයට ළඟාවිය හැක.
නිරංජන් චාමින්ද කරුණාතිලක
0 comments:
Post a Comment