නෙහාරා පීරිස්ට ආදරේ කරන රසික රසිකාවියන් විශාල පිරිසක් මේ රටේ ඉන්නවා. ඒ අය කැමැති වේවි නෙහාරාගේ චූටි කාලේ තොරතුරු දැනගන්න. ඒ හින්දා අපි හිතුවා “චූටි කාලේ වෙච්ච දේවල්” කියන අපේ
හුරුපුරුදු විශේෂාංගයට නොහාරාව එකතු කරගන්න. මේ විශේෂාංගය තුළින් ජනප්රිය කලාකරුවන්ගේ චූටි කාලේ තොරතුරු අරගෙන එන බව ඔබ දන්නවානේ. ඉතින් මේ සතියේ මේ කතාබහ තුළින් අපි අරගෙන එන්නේ නෙහාරාගේ චූටි කාලේ රසබර තොරතුරු.
නෙහාරාගේ ආදරණීය පියා කර්සන් පීරිස්. නෙහාරාගේ මව නිශාන්ති පීරිස්. මේ දෙදෙනා පදිංචි වෙලා හිටියේ මොරටුවේ. ඔය කාලේ මේ දෙන්නගේ කැදැල්ලට අමුත්තෙක් එන ලකුණු පහළ වුණා. දින සති ගෙවිලා ගිහින් ජයවර්ධනපුර රෝහලේදී නිශාන්ති සුන්දර දියණියක් බිහි කළා. අලුත උපන් බිලිඳිය රෝස මලක් වගේ රෝස පාටයිලු. දියණිය දුටු අම්මා “ඇත්තටම මේ මට ඉපදුණු බබාද?” කියලා හිතන තරමට මේ පුංචි දැරිය ලස්සනයිලු. මේ පුංචි දැරියට නමක් දාන්න අවස්ථාව තමයි ඊළඟට එළැඹුණේ. මේ අය කතෝලික ආගමේ හින්දා ඊට සුදුසු නමක් යොදාගත යුතුයි. ඒ අනුව මේ දැරියට “කුමාරසිංහ ආරච්චිගේ දෝන ක්රිශාන්ති නෙහාරා කර්නිෂියා පීරිස්” කියන නම තමයි යොදලා තිබෙන්නේ. අද “නෙහාරා පීරිස්” විදියට රටම හඳුනන්නේ එදා ඒ උපන් පුංචි දැරිය.නෙහාරා චූටි කාලේ බොහොම හුරුබුහුටි සුන්දර දැරියක්ලු. ඒ හින්දම හැමෝගේම ආදරේ මේ චූටි දැරියට ලැබිලා තියෙනවා. මේ විදියට හැමෝගේම ආදරේ තුළ සුරතල් විදියට ජීවිතය ගෙවී යද්දී මේ චූටි දැරිය ආදරය ඉදිරියේ බොහොම ආත්මාර්ථකාමී දැරියක් වුණාලු. තමා වටා සිටින තමන්ට ආදරේ කරන කවුරුන් හෝ වෙන කෙනෙකුට ආදරේ කරනවා දකින්න මේ දැරිය කොහෙත්ම කැමැති නැහැල්ලු. ඒ හින්දම වූ අපූරු සිදුවීමක් තමයි මේ.
මේ සිද්ධිය සිද්ධ වෙනවිට නෙහාරාට අවුරුදු 2 1/2 ක් විතර ඇතිලු. ඔන්න ඉතින් එක දවසක් නෙහාරාගේ අම්මගේ මිතුරියක් ඒ තැනැත්තියගේ අවුරුදු 1 1/2 ක විතර චූටි බබත් එක්ක නෙහාරාලාගේ ගෙදරට ඇවිත්. ඉතින් ඔය වෙලාවේ නෙහාරාලාගේ අම්මා අර අවුරුදු එකහමාරේ චූටි බබාව වඩාගෙන හුරතල් කරනවලු. නෙහාරා සිඟිත්තියට ඒක දැකලා හොඳටෝම කේන්ති ගිහින්. නෙහාරා අර චූටි බබාව සිපගන්න විදියට මුහුණ පාත් කරලා එකපාරටම ඒ චූටි බබාගේ මූණ ලේ එන්න හැපුවලු. එදා නෙහාරාට අම්මාගෙන් හොඳ තරවටුවකුත් ලැබුණලු.
නෙහාරා චූටි කාලේ ඇඟිලි උරන පුරුද්දක් තිබිලා තියෙනවා. අම්මයි, තාත්තයි මේ දැරිවි මේ පුරුද්දෙන් නතර කරවන්න පුදුම විදියට උත්සාහ කළාලු. ඒත් අවවාදවලින් තියා දඬුවම්වලින්වත් දැරියගේ පුරුද්ද නම් නතර කරන්න බැරිවුණාලු. අන්තිමට කට්ටියම මේ දැරිවිගේ ඇඟිල්ලේ කොහොඹ ගාලා. ඒත් නෙහාරාගේ පුරුද්ද නතර වෙලාම නැහැ. පස්සේ කාලෙක මොන්ටිසෝරි යද්දි තමයි ඒ පුරුද්ද නතර වෙලා තියෙන්නේ.
චූටිම කාලෙදි පටන් නෙහාරා නැටුමට ගොඩාක් දක්ෂයිලු. කාගේ හරි සාදයකට ආරාධනා කළාම වෙනමම ඇඳුමක් හා සපත්තු දෙකක් අරගෙන යන එක තමයි නෙහාරාගේ සිරිත. සාදයට හිටපු මොහොතේ පටන් නෙහාරා බලන් ඉන්නේ නැටුමට ආරාධනාවක් එනතුරු. මේ පුංචි දැරිවි ගැන හැමෝම දන්න නිසා ඇය තමන්ගේ පාටියට එනවා කියලා දැනගත්තම ඇයට නටන්නට අනිවාර්යයෙන් ආරාධනා කරන්න මේ කිසිම කෙනෙක් අමතක කරන්නේ නැහැල්ලු. ඉතින් ඒ ආරාධනාව ලැබුණ හැටියෙම අරගෙන යන ඇඳුම ඇඳගෙන නෙහාරා නටන්න පටන් ගන්නවාලු.
අද අපි දකින නෙහාරා බොහොම සිහින් ඉඟසුඟ තියෙන හුරුබුහුටි ළඳක්. ඒත් චූටි කාලෙදි නෙහාරා බොහොම මහත බබෙක්ලු. ඇගේ අතපය ටයර් වගේ හින්දා ඥාතීන් මේ දැරිවිට කියලා තියෙන්නේ “මිචෙලිං බබා” කියලා. වෙන චූටි දරුවන්ට කෑම කවන්න අම්මලා බොහොම දුෂ්කරතා විඳිනවා වුණාට නෙහාරා බබාට කෑම කවන්න නම් ඇගේ අම්මා ඒ විදියට දුක් විඳලා නැහැ. මේ සිඟිති දැරිය ඕනෑම දෙයක් බඩකට පුරා කන්න පසුබට වන්නේ නැහැල්ලු. ඇය බොහොම මහත කෙනෙක් වෙලා ඉඳලා තියෙන්නේ ඒකයි.
0 comments:
Post a Comment